Abdul-Selam Selami, bartës i listës për këshilltar në qytetin e Shkupit nga koalicioni AKI, mbrëmë hapi shtabin e parë zgjedhor në lagjen Gazibabë, së bashku me kandidatin për kryetar të komunës Çair, Bujar Osmani.
Me emocion dhe krenari, Selami theksoi se zgjedhja e Gazibabës për nisjen e këtij rrugëtimi nuk ishte rastësore.
“Gazibaba është vendi ku kam lindur e jam rritur. Është vendi që më ka dhënë vlerat, përvojën dhe forcën për të ecur përpara. Për mua hapja e shtabit këtu nuk është vetëm një akt politik, por një betim se rruga ime drejt Shkupit fillon aty ku filloi edhe vetë jeta ime,” – u shpreh ai.
Selami u bëri thirrje banorëve të Shkupit që bashkë të sjellin ndryshimin dhe zhvillimin, duke theksuar rolin e Gazibabës si një shtyllë e rëndësishme e progresit në kryeqytet.
“Shkupi ka nevojë për zërin, për mbështetjen dhe për energjinë e banorëve të Gazibabës që gjithmonë kanë ditur të jenë shtylla e zhvillimit. Le të fillojmë nga Gazibaba për ta ngritur gjithë Shkupin,” – përfundoi Selami.
