Kryetari i njërit krah të Aleancës për Shqiptarët, Ziadin Sela, në fjalimin e fundvitit tha se viti 2024 ishte goditës për ASH-në, e cila tashmë është e ndarë. Megjithatë, Sela vlerëson se në partinë e tij ngelën idealistët, ndërsa u larguan ata që e shikonin partinë vetëm si opsion për t’u marrë me politikë.
Sela mes tjerash kishte kritika edhe për qeverinë.
“Ky është viti në të cilin rëndë u shkel përcaktimi programor i ASh-së, por edhe i politikbërjes shqiptare në përgjithësi. U shkel mbi vullnetin e shqiptarëve dhe u krijua një qeverisje pa legjitmitet. Periudha që pason, natyrisht që do të përballemi me këto pasoja që i krijon kjo mospasje legjitimiteti në emër të së cilës qeverisin. Sot kemi një qeverisje absolute nga ana e VMRO-DPMNE-së dhe VMRO-DPMNE-së, sepse nuk di t’i vlerësojë ndryshe eksponentët shqiptarë përbrenda Qeverisë, për sa kohë që janë aty dhe i shohim në çdo deklarim të tyre që bëjnë që vetëm janë një kopje e shëmtuar, përkthim i qëndrimeve që VMRO-DPMNE-ja dhe kryeministri i vendit i ka” – u shpreh Kryetari i ASH-së, Zijadin Sela.
