Në komunën e Zhelinës kanë nisur punimet ndërtimore për renovimin e shkollës fillore “Pashko Vasa” në fshatin Dëbërcë. Investimi parasheh zëvendësimin e dyerve dhe dritareve të vjetra, izolimin e jashtëm të objektit si dhe rikonstruktimin e kulmit, duke i dhënë fund kushteve të vjetruara me të cilat nxënësit dhe mësimdhënësit përballeshin prej vitesh.
Kryetari i Komunës së Zhelinës, Blerim Sejdiu, theksoi se ky projekt nuk është thjesht përmirësim infrastrukture, por një investim i drejtpërdrejtë në të ardhmen e gjeneratave të reja.
“Po e transformojmë të gjithë shkollën, por në të vërtetë po investojmë në dijen, në rininë dhe në fëmijët tanë. Dalëngadalë, por me hapa të sigurt, po punojmë në çdo fshat dhe në çdo sferë, për një arsim cilësor dhe me kushte moderne, ashtu siç e meritojnë qytetarët tanë. Ne nuk flasim me zhurmë, flasim me punë”, deklaroi Sejdiu.
