Kandidati për kryetar të Komunës së Likovës nga radhët e VLEN, Nexhmedin Sadiku, ka reaguar ndaj nismës së kryetarit aktual, Erkan Arifi, i cili ditë më parë paralajmëroi vendosjen e tri pikave publike për internet falas, duke e quajtur këtë “hap drejt transformimit digjital” të komunës.
Sadiku i është drejtuar publikisht Arifit me pyetje konkrete. “Cilat shërbime komunale janë digjitalizuar deri më sot? Për çfarë transformimi digjital e keni fjalën, kur në komunën tonë nuk është investuar as në një kabinet të vetëm informatike? Sa start-up-e të zhvillimit softuerik janë hapur në Likovë dhe sa prej tyre kanë pasur mbështetje direkte nga komuna? Asnjë”, thotë Sadiku.
Ai theksoi se Likova mbetet një nga komunat më të varfra, ku qytetarët ende përballen me mungesë uji, kanalizimi dhe infrastrukturë rrugore, ndërkohë që edhe shkollat fillore nuk kanë qasje të mjaftueshme në internet.
Sadiku premtoi se nëse merr besimin e qytetarëve, brenda një mandati do të realizojë:
• Digjitalizimin e shumicës së shërbimeve komunale;
• Subvencionimin e start-up-eve në fushën e zhvillimit softuerik;
• Investime në kabinete informatike në shkolla;
• Financim të kurseve të informatikës për fëmijë dhe të rritur.
“Katër vitet e ardhshme, Likovën do ta digjitalizojmë ashtu siç e meriton, me punë konkrete e jo me farzë”, theksoi Sadiku.
