Kandidati i VLEN-it për kryetar të Komunës së Likovës, Nexhmedin Sadiku, në një intervistë për Tv News ka përkujtuar sakrificën e fshatit Sllupçan, vendlindjes së tij, gjatë konfliktit të armatosur të vitit 2001. Ai përkujtoi edhe dy familjarët e tij të rënë dëshmorë gjatë konfliktit, Beqir Sadikun dhe Harun Kasumin.
“Sheshi mbanë emrin e djalit të axhës Beqir Sadiku, dëshmor i kombit, pjesëtar i tri luftërave. Gjithashtu edhe kushëriri i dytë, Harun Kasumi, edhe ai bie dëshmor këtu në hyrje të fshatit, ndërsa Beqiri bie më 22 qershor në Haraçinë të Shkupit. Normalisht ka qenë pjesa më e vështirë, më emocionale, jo vetëm për mua si familjar, por edhe për fshatin në përgjithësi”, deklaroi Sadiku.
Ai theksoi se Sllupçani ka qenë epiqendra e konfliktit dhe ka merituar shumë më shumë sesa trajtimi që i është bërë në vitet e pasluftës.
“Ky vendbanim ka qenë epiqendra e zhvillimeve të luftës së vitit 2001. Mendoj që ka merituar shumë më shumë. Çdo banor i këtij fshati në baza vullnetare ka pranuar në një formë edhe të vdesë. Kanë refuzuar të shpërngulen deri në momentin kur ndodh ngjarja makabre ndaj familjes Zymberi”, tha Nexhmedin Sadiku.
Ai tha se me qeverisjen e tij, Sllupçani si dhe e gjithë Likova do ta marrë vëmendjen e merituar.
