Kandidati i VLEN për kryetar të Komunës së Likovës, Nexhmedin Sadiku, së bashku me zëvendëskryeministrin Arben Fetai, ka vizituar fshatin Hotël ku është takuar me udhëheqësit e bashkësisë lokale.
Gjatë takimit, Sadiku vlerësoi angazhimin e banorëve dhe punën e bashkësisë lokale, duke theksuar se Hotla është një shembull i përkushtimit dhe organizimit përmes projekteve të shumta që ka realizuar deri më tani.
“Ky angazhim i tyre do të ketë mbështetjen tonë të plotë, ndërsa Komuna do të realizojë projektet e domosdoshme si ujësjellësi, kanalizimi, rregullimi i shtratit të lumit dhe të tjera, për ta çuar fshatin Hotël drejt zhvillimit dhe standardeve më të larta të jetesës për banorët”, u shpreh Sadiku.
Ai shtoi se Likova meriton më shumë dhe se VLEN mbetet e përkushtuar që përmes investimeve konkrete të sjellë kushte më të mira për të gjithë banorët e komunës.
