Rusia thotë se përdorimi i raketave amerikane me rreze të gjatë veprimi nga Ukraina do të çojë në “një përgjigje të përshtatshme dhe të prekshme”. Ministria e Jashtme tha në një deklaratë se një sulm i tillë brenda territorit rus do të përfaqësonte përfshirjen e drejtpërdrejtë të Shteteve të Bashkuara dhe satelitëve të saj në armiqësitë kundër Rusisë.
Presidenti amerikan Joe Biden i dha dritën jeshile Ukrainës për përdorimin e raketave me rreze të gjatë veprimi në territorin rus, dy muaj para se ai të largohet nga Shtëpia e Bardhë.
Nuk është e qartë nëse pasardhësi i tij, presidenti i sapozgjedhur Donald Trump, është konsultuar ose nëse ai do t’i përmbahet vendimit, pasi ka premtuar t’i japë fund luftës Rusi-Ukrainë.
Ukraina ka pasur ATACMS të SHBA-së (Sistemi i Raketave Taktike të Ushtrisë) me një rreze veprimi prej 300 km (190 milje) – si dhe raketa franceze dhe britanike “Storm Shadow” të një gamë të ngjashme – por aleatët perëndimorë e kishin ndaluar Kievin të godiste Rusinë me to.
Vendimi i Biden për të hequr këtë kusht është një moment i rëndësishëm në luftë, e cila shënon ditën e saj të 1000-të të martën. Rusia filloi një pushtim të plotë të Ukrainës më 24 shkurt 2022.
