Ish-diplomati amerikan, James Rubin dëshmoi për tri ditë në Hagë. Ai ishte dëshmitari i parë i thirrur për të dëshmuar nga mbrojtja e Thaçit.
Rubin e nisi dëshminë e tij më 15 shtator, duke thënë se Hashim Thaçi kishte rol kryesisht politik dhe nuk kishte kompetenca për vendime ushtarake brenda UÇK-së. Sipas tij, ai duhej të merrte miratimin e komandantëve për çdo vendim të rëndësishëm ushtarak.
Së fundmi në një intervistë, Rubin ka folur për dëshminë e tij, shkruan gazeta online Reporteri.net.
Ai ka thënë se gjatë dëshmisë tre ditore të tij si dëshmitar i mbrojtjes në gjyqin ndaj ish-krerëve të UÇK-së, pyetjet e gjyqtarëve ishin të anshëm. Rubin tha se kjo Gjykatë duhet të bëjë gjënë e duhur, dhe të shpallë të pafajshëm ish-krerët e UÇK-së
“Unë dëshmova për tri ditë të gjata, por duhet të them këtu se gjyqtarët, për habinë time, më bënë pyetje që dukeshin jashtëzakonisht të njëanshme. Ato nuk tingëllonin si pyetje që kishin për qëllim gjetjen e fakteve. Prokurori ka të drejtë të paraqesë rastin e tij, po ashtu edhe mbrojtja. Gjyqtarët mbledhin evidenca, në mënyrë që të mund të japin një gjykim. Dhe nga pyetjet që mora nga disa gjykatës, pata ndjenjën se ata tashmë kanë vendosur që UÇK ishte një organizatë komplet funksionale, që Hashim Thaçi ishte në krye të saj, çka nuk është vërtetë. Kjo gjykatë duhet të bëjë gjënë e duhur, ta shpallë të pafajshëm dhe pastaj Shtetet e Bashkuara së bashku me Evropën, duhet të ulen me udhëheqësit e Kosovës dhe të Serbisë dhe të rregullojnë këtë problem, Rubin në një intervistë për gazetaren amerikane, Christiane Amanpour.
