Transportuesit privat paralajmërojnë se në çdo kohë mund të ndërpresin qarkullimin, për shkak të borxhit të pa shlyer që Ndërmarrja e Qarkullimit Publik ka ndaj tyre.
Sipas transportuesve privat, për vitin 2025 NQP nuk ka shlyer pagesën për asnjë muaj ndaj tyre ndërsa ende kanë muaj të pa paguar edhe për vitin 2024.
“Nuk ka mjete dhe nuk mund të funksionojmë kështu, pagesën e fundit e kemi marrë para dy muajve dhe ata janë të vitit 2024 por ende na kanë borxh për vitin 2024. Viti 2025 nuk është paguar aspak, pra kanë borxhe të vitit 2024. Çfarë do të bëni? Premtime ka që do të bëhet por realizime nuk ka, edhe ne s’mund të funksionojmë, s’kemi financa dhe mendojmë se do ta ndërpresim punën”, deklaroi Uzeir Ameti – Transportues privat.
Ndërprerjen e qarkullimit të transportuesve privat e pësojnë më së shumti qytetarët dhe nxënësit. Ata fajësojnë Ndërmarrjen e Qarkullimit Publik dhe Qytetin e Shkupit.
”Mendoj se shumë pak u kushtohet rëndësi transportuesve privat, ato kanë probleme të mëdha, nuk mundët të varen nga NQP-ja kur do t’ua bëjë pagesën sepse atyre u duhen paratë që të mund të mbushin derivate dhe të shërbejnë”, tha një qytetar.
“Në Studeniçan ka në një orë autobus, kjo është pak sepse duhet të ketë çdo gjysmë orë. Nxënësit si udhëtojnë? Transporti i nxënësve është problem i madh, më herët kishte në ora 12:00 por e ndërprenë atë dhe tani nxënësit udhëtojnë me 67-shin dhe humbin shumë kohë”, u shpreh një tjetër qytetar.
“Jo nuk ka autobusë, presim me orë. Pret ato privat apo të NQP-së? Kush të vijë por asnjë nuk vjen, sidomos në fundjavë, humbim nga dy orë duke pritur rrugëve”, theksoi një qytetar.
As Ndërmarrja e Qarkullimit Publik dhe as Qyteti i Shkupit nuk u përgjigjen në pyetjen për gjendjen aktuale me transportuesit. Në ditët në vazhdim pritet të shihet nëse do të rikthehet kaosi me transportin urban të Shkupit. /Alsat.mk
