“Kamerat nuk do të lëshohen në funksionim pa e marr përgjigjen pozitive nga Agjencia për mbrojtjen e të dhënave personale. Do të thotë ne në çdo moment presim përgjigje pozitive dhe do të kemi. Pastaj kamerat do të lëshohen në përdorim në atë moment që do ta marrim përgjigjen prej tyre”, tha
Pranvera Izairi, drejtoreshë e Spitalit Gjinekologjik “Nënë Tereza” Çair.
Sipas specifikave të tenderit të 2024, kamerat e reja kanë mikrofon, duke shtuar dilemat tek personeli mjekësor dhe i pacientëve përse duhet të bëhet një përgjim i jashtëligjshëm.
Drejtoresha Izairi e pranon se kamerat përmbajnë edhe mikrofon, por thotë se zëri nuk do të regjistrohet.
“Specifikimi është e vërtetë se i përmban mikrofonat e integruar, edhe specifikacioni paraprak i ka pasur mikrofonat e integruar por nuk do të thotë se ato do të përdoren. Ato nuk do të përdoren! Kamerat e reja edhe të vjetrat që janë në përdorim nuk do ta regjistrojnë zërin”, shtoi Pranvera Izairi, Drejtoreshë e Spitalit Gjinekologjik “Nënë Tereza” Çair.
Edhe ministri i Shëndetësisë tha se nuk guxon asnjë institucion shëndetësor publik të ketë kamera për regjistrim të zërit. Arben Taravari tha se duhet të rishikohet tenderi për të marrë masa.
“Ju lutem, bisedoni me drejtoreshën! Nuk besoj se kurrë se do të mund të ndodh kjo. Nëse ka diçka të tillë është serioze dhe atëherë mund të mendojmë edhe për hapa tjerë, eventualisht!”, deklaroi Arben Taraavri, ministër i Shëndetësisë.
Ndryshe TV21 pyeti Agjencinë për mbrojtjen e të dhënave personale, nga ku thonë se nuk kanë pranuar ndonjë kërkesë për mendim nga gjinekologjia në fjalë.
Nga atje thonë se shkelja është bërë qysh në procedurën e tenderimit, ku mendimi për cenim eventual të privatësisë është dashur të merret para se të vendosen kamerat nëpër objekt.
Ndonëse në planin vjetor nuk kanë qenë të parapara vendosje të reja të kamerave, drejtoresha Izairi ka ndarë 20 mijë euro nga buxheti i spitalit për 22 kamera, pajisje për ruajtjen e video-materialeve dhe për evidencë të të punësuarve dhe instalim të tyre.
TV21 siguroi edhe tendera të viteve të kaluara, kur janë vendosur kamerat e vjetra por të njëjtat nuk kanë pasur mikrofon.
