Fran García mund të jetë duke përjetuar muajt e fundit si lojtar i Real Madridit.
Mbrojtësi i majtë, i cili ka përfituar më shumë minuta këtë sezon, ende nuk është vendosur si titullar i padiskutueshëm në formacionin e Carlo Ancelottit, duke alternuar pozicionin e tij me Ferland Mendy. Kjo situatë ka tërhequr interesin e Juventusit në Torino, të cilët janë të gatshëm të paguajnë një shumë të konsiderueshme për të siguruar shërbimet e tij, transmeton Insajderi.
Raportet nga Italia tregojnë se bianconerët kanë filluar tashmë përgatitjet për largimin e mundshëm të Andrea Cambiaso, një nga lojtarët premtues në krahun e majtë. Duke parë vështirësinë gjithnjë në rritje për të mbajtur futbollistin e ri, klubi italian ka aktivizuar kërkimin për një zëvendësues të besueshëm — dhe Fran García aktualisht shihet si opsioni më bindës.
Sipas DefensaCentral, ata po shqyrtojnë një ofertë rreth 25 milionë euro, propozim që Real Madrid po e merr seriozisht në konsideratë.
Megjithëse lojtari ka grumbulluar minuta të rëndësishme këtë sezon, roli i tij nuk ka qenë i garantuar, duke lënë të hapur derën për një shitje të mundshme, nëse vetë Fran kërkon largimin.
Klubi madrilen nuk përjashton mundësinë që ai të qëndrojë, por e sheh me sy pozitiv një operacion që mund të sjellë përfitime ekonomike dhe të lejojë përforcimin e skuadrës në pozicione të tjera.
Nëse transferimi i tij drejt Juventusit realizohet, Real Madrid planifikon të aktivizojë klauzolën e blerjes së Miguel Gutiérrez, aktualisht te Girona, për një shumë rreth 8 milionë euro.
Në këtë mënyrë, operacioni do të siguronte një fitim të konsiderueshëm për klubin madrilen, duke ruajtur njëkohësisht angazhimin ndaj rritjes së talenteve nga akademia.
Megjithatë, vendimi përfundimtar do të varet nga Fran García dhe dëshira e tij për të qëndruar në Madrid apo për të nisur një kapitull të ri në Torino.
