Është i tmerrshëm fakti që ish-krerët e Ushtrisë Çlirimtare të Kosovës po vazhdojnë të mbahen në Hagë nën akuzën për krime lufte, edhe pesë vjet pas arrestimit, ka thënë kryeministri i Shqipërisë, Edi Rama.
Hashim Thaçi, Kadri Veseli, Rexhep Selimi e Jakup Krasniqi ndodhen në qendrën e paraburgimit në Hagë që nga nëntori i vitit 2020.
“A nuk është e tmerrshme ta mendosh se shpëtimtarët e një kohe kur vetë ekzistenca e Kosovës ishte në tehun e thikës së gjatë të padrejtësisë historike ndaj shqiptarëve, duhet të paraqiten para një gjykate të dalë krejt nga shinat mbi të cilat u ngrit, për të dëshmuar se lufta për liri nuk është krim, se rebelimi ndaj një diktature nacional-socialiste nuk është faj, se shteti i ri e sovran i Kosovës nuk ka dalë nga barku i një ndërmarrjeje kriminale, po nga gjaku i një ushtrie çlirimtare?!”, ka shkruar ai.
Rama ka thënë po ashtu se është turp për drejtësinë ndërkombëtare e “edhe më zi” për siç ka thënë ai, “shqipsharësit digjitalë” që ish-presidentin Hashim Thaçi e shohin si armik politik.
Kryeministri shqiptar ka shtuar se emri i ish-presidentit Hashim Thaçi do të mbetet përgjithnjë si “emri i njeriut që u bë njësh me fatin, lirinë dhe pavarësinë e Kosovës”.
“Çfarë turpi për drejtësinë ndërkombëtare dhe edhe më zi për shqipsharësit digjitalë, tifozë të verbuar prej budallakisë kinse patriotike, që edhe mbrapa hekurave të kësaj padrejtësie ulëritëse, e shohin dhe trajtojnë Hashim Thaçin si armik politik, duke uruar të mos dalë më kurrë prej aty; ndërkohë që kur atyre t’u jetë harruar nami e nishani dhe asaj gjykate t’i ketë mbetur vetëm njolla e turpit të historisë, emri i Hashimit do të mbetet përgjithnjë si emri i njeriut që u bë njësh me fatin, lirinë dhe pavarësinë e Kosovës.”
Së fundmi, në Kosovë, Hagë dhe Shqipëri janë mbajtur protesta në mbështetje të ish-eprorëve të UÇK-së. Në mbështetje të protestuesve që kërkonin drejtësi ishte edhe vetë kryeministri Edi Rama.
