Kryeministri i Shqipërisë Edi Rama, ka kërkuar drejtësi për Kosovën dhe çlirimtarët e saj.
Në ditën kur u mbajt protesta të Hagë, Rama shkroi në Facebook “Drejtësi pra drejtësi, vetëm drejtësi, asgjë më shumë se sa drejtësi dhe asgjë tjetër përveç drejtësisë, për Kosovën dhe Çlirimtarët e saj”.
Mërgata shqiptare ka mbajtur protestë masive në Hagë, qytetin holandez ku e ka selinë Gjykata Speciale. Shqiptarë nga e gjithë bota kanë kërkuar drejtësi dhe lirim të ish-krerëve të Ushtrisë Çlirimtare të Kosovës, duke dërguar mesazhe edhe përmes parullave në gjuhën angleze. Me flamuj kuq e zi e duke brohoritur njëzëri “UÇK”, ata kanë “pushtuar” Hagën, ku mes tjerash u tha se “Ta quash UÇK-në organizatë kriminale është ofendim i madh për NATO-n”.
Protesta e sotme është organizuar nga mërgata shqiptare në mbështetje e Organizatës së Veteranëve të Luftës së Ushtrisë Çlirimtare të Kosovës (OVL-UÇK).
Ish-ambasadori i Holandës në Kosovë, Robert Bosch, që ishte njëri nga folësit në protestën për drejtësi qe po mbahet në Hagë kujtoi kohën kur kishte biseduar me Hashim Thaçin për krijimin e Dhomave të Specializuara të Kosovës.
Më tej, para mijëra shqiptarëve ai shtoi se “është totalisht marrëzi të quhet UÇK ndërmarrje kriminale”.
Një protestë tjetër në Hagë ishte mbajtur në prill të vitit 2023, në kohën kur kishte nisur gjykimi ndaj ish-eprorëve të UÇK-së. Së fundmi në Prishtinë, ishte mbajtur edhe një protestë, kundër padrejtësisë që OVL-UÇK vlerësojnë se po i bën Gjykata Speciale në Hagë.
Kjo protestë po mbahet një ditë para fillimit të dëgjimit të dëshmitarit të parë të mbrojtjes në gjykatoren e Speciales, ish-ndihmëssekretari amerikan i Shtetit për Marrëdhënie me Publikun, James Rubin.
