Kryetari i Qeverisë së Republikës së Maqedonisë së Veriut, Hristijan Mickoski duke u përgjigjur në pyetjen gazetareske lidhur me informacionin e miratuar në mbledhjen e djeshme të Qeverisë, që ka të bëjë me nevojën për blerje të autobusëve ekologjikë për transport publik për NQP-Shkup dhe njësitë e vetëqeverisjes lokale, sqaroi se bëhet fjalë për vendim për fillimin e procedurës për blerje të 120 autobusëve.
“Qeveria në mbledhjen e djeshme solli vendim për fillimin e procedurës për blerjen e 120 autobusëve. Prej tyre, 80 do të jenë të dedikuar për Ndërmarrjen e Qarkullimit Publik në Shkup, ndërsa 40 do të shpërndahen në këtë fazë fillestare te ndërmarrjet e tjera të transportit nëpër komuna, ku ka transport publik të organizuar urban, bazuar në nevojat dhe vlerësimet. Bëhet fjalë për autobusë elektrikë, ekologjikë,” tha Mickoski.
Kryeministri Mickoski theksoi se Qeveria po bën një hap përpara në sigurimin e ajrit të pastër dhe një mjedis jetësor më të denjë për qytetarët.
“Ajo që është e rëndësishme është se nuk do të ketë ndotje, gjë që u nevojitet dëshpërimisht qytetarëve, veçanërisht gjatë sezonit të ngrohjes. Ne, si Qeveri, vlerësojmë se po bëjmë një hap përpara në atë drejtim. E kemi thënë se sigurimi i një mjedisi të denjë për jetesë për bashkëqytetarët tanë, ku përfshihet edhe ajri i pastër, për ne paraqet imperativ. Por ky është një proces që kërkon shumë kohë. Mirëpo, nëse ulemi dhe vetëm shikojmë si kalon koha pa bërë asgjë, pa qenë proaktiv, por vetëm reaktiv, atëherë nuk do të arrijmë deri tek zgjidhja. Prandaj, ne duam të jemi proaktiv, të ofrojmë politika, të krijojmë politika dhe të arrijmë qëllimin tonë – një mjedis jetësor të mirë dhe të denjë për qytetarët tanë.” theksoi Mickoski.
