Publikohet marrëveshja tripalëshe ushtarake e nënshkruar mes Shqipërisë, Kosovës dhe Kroacisë. Në të thuhet se dakordimi i tri shteteve synon të forcojë aftësitë mbrojtëse të tre vendeve, të rrisë bashkëpunimin në industrinë e mbrojtjes dhe të përmirësojë ndërveprimin ushtarak. Sipas përgjegjësve të resoreve mbrojtëse, marrëveshja vjen në bazë të marrëdhënieve të forta dhe të qëndrueshme ndërmjet Shqipërisë, Kroacisë dhe Kosovës, të bazuara në vlerat e përbashkëta, orientimet strategjike dhe angazhimet reciproke drejt sigurisë dhe bashkëpunimit rajonal. Tri vendet janë të vendosur për t’u siguruar që jemi të pozicionuar mirë për t’u bërë ballë kërcënimeve aktuale dhe në zhvillim, si dhe për të arritur objektivat tona të mbrojtjes dhe sigurisë, thuhet në dokumentin e përbashkët.
“Ne: Ministri i Mbrojtjes i Republikës së Shqipërisë, Zëvendëskryeministri dhe Ministri i Mbrojtjes i Republikës së Kroacisë, si dhe Ministri i Mbrojtjes i Republikës së Kosovës, deklarojmë angazhimin tonë si më poshtë:
Promovimin e kapaciteteve mbrojtëse dhe bashkëpunimin për industrinë përkatëse; rritjen e ndërveprueshmërisë nëpërmjet edukimit, trajnimeve dhe stërvitjeve; kundërpërgjigjen ndaj kërcënimeve hibride dhe rritjen e qëndrueshmërisë; ofrimin e mbështetjes së plotë për integrimin euroatlantik.”
Në Deklaratë e Përbashkët potencohet se dakordimi është bërë në frymën e miqësisë, solidaritetit dhe besimit të ndërsjellë dhe se pasqyron vizione të përbashkëta strategjike të të trija vendeve mike. Marrëveshja nuk krijon asnjë detyrim të ri ligjor ndërkombëtar ose ndërqeveritar ndërmjet shteteve, as nuk ndikon në detyrimet ekzistuese me shtetet e tjera, përfundohet në deklaratën për mbrojtje të Shqipërisë, Kosovës dhe Kroacisë.
