Gjykata Kushtetuese ka publikuar të plotë aktgjykimin lidhur me ankesat e adresuara nga grupi parlamentar i PDK-së dhe LDK-së për konstituimin e Kuvendit të Kosovës.
Aktgjykimi i Kushtetueses urdhëron që kryetari dhe nënkryetarët e Kuvendit të zgjidhen me votim të hapur në një periudhë prej 30 ditësh. Ky aktgjykim parasheh se kandidati për kryetar ka të drejtë të votohet vetëm deri në tri herë, në rast se dështon të zgjidhet.
“TË URDHËROJË, me 6 (gjashtë) vota për dhe 1 (një) kundër, Kryesuesin e Seancës Konstituive të Kuvendit të Republikës së Kosovës të vazhdojë me pikën 3 të rendit të ditës së Seancës Konstituive, të miratuar më 8 prill 2025, dhe në pajtim me paragrafin 2 të nenit 67 [Zgjedhja e Kryetarit dhe Nënkryetarëve] të Kushtetutës së Republikës së Kosovës, të ftojë përfaqësuesin e grupit më të madh parlamentar për të propozuar kandidatin/en për Kryetar/e të Kuvendit të Republikës së Kosovës, i/e cili/cila zgjedhet përmes votimit të hapur, votim i cili mund të realizohet vetëm deri në 3 (tre) herë për kandidatin/en e njëjtë”, thuhet në aktgjykim.
Aktgjykimi po ashtu gjen shkelje kushtetuese të kryesuesit të Kuvendit, Avni Dehari.
“TË KONSTATOJË, njëzëri, që Kryesuesi i Seancës Konstituive të Kuvendit të Republikës së Kosovës, nuk ka vepruar në pajtueshmëri me Aktgjykimin e Gjykatës Kushtetuese të Republikës së Kosovës në rastin KO124/25, të 26 qershorit 2025 dhe rrjedhimisht veprimet e tij janë në papajtueshmëri me paragrafin 1 të nenit 116 [Efekti Juridik i Vendimeve] të Kushtetutës së Republikës së Kosovës”.
Gjykata Kushtetuese ka obliguar të gjithë deputetët që të jenë pjesëmarrës në seancën konstituive.
Kushtetuesja po ashtu ka zgjatur masën e përkohshme të vendosur më 24 korrik. /Insajderi.org/
