Ministria malazeze e Transportit urdhëroi nisjen e një hetimi të menjëhershëm pas indinjatës që shkaktoi vendosja e një tabele rrugore në Plavë, ku qyteti i Pejës, që ndodhet në Kosovë, ishte shënuar si pjesë e Serbisë.
Tabela u hoq në 6 prill, e teksa nuk dihet se kur ishte vendosur me saktësi, reagimet ndaj saj ishin të shumta, dhe indinjata që ngjalli, e madhe, pasi u përshkrua si “provokim i pastër”.
Ministria nuk ka dhënë përgjigje se kush ka urdhëruar vendosjen dhe më pas heqjen e objektit polemizues të sinjalistikës rrugore në zonën e ndodhur pranë kufirit malazezo-kosovar.
“Drejtoria e Transportit është përgjegjëse për vendosjen e sinjalizimit rrugor përgjatë rrugëve magjistrale dhe rajonale. Ministria është në dijeni për rastin në fjalë dhe kemi urdhëruar Inspektoratin që të dalë në terren dhe të veprojë në përputhje me gjendjen faktike dhe ligjin”, thuhet në një deklaratë të saj.
Faji për vendosjen e tabelës, ndërkohë mbetet jetim. Sipas Ligjit për sigurinë e komunikacionit, për vendosjen e sinjalizimit rrugor është përgjegjëse Drejtoria e Transportit me pëlqimin e Ministrisë së Punëve të Brendshme.
REL-i i ka drejtuar pyetje kësaj ministrie se kush e ka urdhëruar prodhimin dhe vendosjen e tabelës, përmbajtja e së cilës bie ndesh me njohjen e shtetit të Kosovës nga Mali i Zi, por nuk ka marrë përgjigje. Edhe pushteti lokal sakaq, insiston se nuk ka pasur asnjë rol në vendosjen e tabelës.
Në krye të ministrisë malazeze të transportit është Maja Vukiçevic nga Partia Demokratike Popullore, e njohur për orientimin e saj pro ruso-serb.
