Kryetari i Lidhjes së Sindikatave të Maqedonisë, Sllobodan Trendafillov, sot konfirmoi se Sindikata e AOGJSH-së ka marrë përgjigje se është pranuar kërkesa për takim në Qeveri, që do të ndodh pas kthimit të delegacionit qeveritar nga SHBA-ja, përcjell TV21. Kjo vijon pasi që të punësuarit në 6 ministri, Enti shtetëror për statistikë dhe Arkiva shtetërore disa ditë mbajtën protestë gjysmë orëshe paralajmëruese duke kërkuar që t’u paguhen shtesa të pagave prej 30% dhe të nënshkruhet marrëveshje kolektive.
“Shpresojmë se kjo do të jetë sa më shpejt që është e mundur duke pasur parasysh se koleget dhe kolegët e këtyre 6 ministrive dhe dy institucioneve të tjera presin që të intensifikohen bisedimet që u ndërprenë për shkak të refuzimit të marrëveshjeve aneks të marrëveshjeve kolektive nga ana e Ministrisë së Financave. Për këto arsye, sindikata e AOGJSH zgjat dorën përmes dialogut social që të gjendet zgjidhje adekuate, por koleget dhe kolegët e këtyre institucioneve janë të gatshëm që t’i vazhdojnë protestat dhe eventualisht të ndërmarrin edhe aktivitete të tjetra sipas ligjit”, thotë Sllobodan Trendafillov, kryetar i LSM-së.
