Nepali ka hequr ndalimin e mediave sociale, pasi kjo shkaktoi protesta kundër korrupsionit që çuan në përleshje me policinë, duke lënë të paktën 23 persona të vdekur.
Vendimi u mor pasi demonstratat nuk u ndalën as pas dorëheqjes së kryeministrit të vendit, teksa protestuesit dogjën edhe godina qeveritare, mes tyre ajo e Parlamentit.
Në javët para ndalimit, në mediat sociale kishte filluar një fushatë “nepo kid”, duke vënë në qendër të vëmendjes stilin e jetës luksoze të fëmijëve të politikanëve dhe akuzat për korrupsion.
Kur qeveria vendosi të ndalojë 26 platforma të mediave sociale, përfshirë Facebook-un dhe YouTube-in, shpërthyen protesta me mijëra të rinj që sulmuan parlamentin në kryeqytetin Katmandu të hënën. Disa lagje tani janë nën shtetrrethim.
Një ministër i qeverisë tha se ata e hoqën ndalimin pas një takimi urgjent vonë të hënën në mbrëmje për të “adresuar kërkesat e Gjeneratës Z”, informon BBC.
Të rinjtë që dolën në rrugë të hënën thanë se po protestonin gjithashtu kundër asaj që e shihnin si qëndrim autoritar të qeverisë. Shumë prej tyre mbanin pankarta me slogane si “mjaft më” dhe “fund korrupsionit”.
Disa protestues hodhën gurë drejt shtëpisë së kryeministrit KP Sharma Oli në qytetin e tij të lindjes, Damak. Oli u dorëhoq ditën e sotme pas përshkallëzimit të situatës.
