Opozita në Tiranë mban këtë të enjte protestën e radhës para Bashkisë së Tiranës, ku sërish do të kërkojë dorëheqjen e kryebashkiakut Erion Veliaj.
Tubimi është planifikuar të nisi në orën 11:00, ndaj Policia njofton se do të ketë bllokime të disa segmenteve rrugore, si dhe bllokime të pjesshme të disa segmenteve të tjera në varësi të lëvizjes së tubuesve.
Prej orës 09:30 e deri në përfundim, do të ketë bllokim të përkohshëm të qarkullimit të mjeteve, në bulevardin kryesor pranë Bashkisë së Tiranës. Policia apelon për të gjithë qytetarët që të shmangin lëvizjen në këto akse rrugore dhe të përdorin rrugë alternative, deri në përfundim të tubimit, si Unaza e Mesme dhe Unaza e Madhe.
