Koncepti i të mësuarit të përjetshëm është jashtëzakonisht i rëndësishëm përballë ndryshimeve të mëdha në tregun e punës, sfidave të rëndësishme demografike dhe zhvillimit të shpejtë teknologjik. Mundëson aktivizimin e të papunëve, ndërsa ata që punojnë, mbeten konkurrues në tregun e punës dhe marrin mundësi më të mira pune. Në planin shoqëror paraqet instrument të fuqishëm për zhvillim.
Këtë e theksoi ministrja e Arsimit dhe Shkencës, Prof. Dr. Vesna Janevska në promovimin e sotëm të Strategjisë së re për arsimin e të rriturve 2025-2030, e përgatitur në kuadër të projektit të Qendrës për Arsimin e të Rriturve, financuar nga Bashkimi Evropian.
“Është e qartë se pa fuqi punëtore të trajnuar dhe fleksibël në mënyrë adekuate, të gatshme për të përdorur teknologjitë e reja, nuk mund të bëjmë kërcimin ekonomik që na nevojitet. Nga ana tjetër, vërehet rënie e vazhdueshme e natalitetit dhe rritje e migrimit. Andaj, në reformën e sistemit arsimor duhet të fokusohemi edhe në përmirësimin e arsimit të të rriturve”, theksoi Janevska.
Në sistemin e arsimit të të rriturve, përveç Ministrisë së Arsimit dhe Shkencës dhe Qendrës për Arsim të të Rriturve, janë të përfshirë edhe organizata të tjera qeveritare dhe joqeveritare ndërsa me mbështetjen ndërkombëtare,u shpreh ministrja, është e mundësuar të përmirësohet cilësia dhe të zgjerohet shtrirja e grupeve vulnerabël, që janë synim i rëndësishëm drejt të cilit synohet arsimi i të rriturve.
“Ky sistem, së bashku me Ligjin për Arsimin e të Rriturve të miratuar së fundmi, krijon bazë të fortë për zhvillimin e programeve të aksesueshme dhe përkatëse, të përshtatura për nevojat e individëve dhe kompanive, mbikëqyrjen dhe menaxhimin e tyre. Ju rikujtoj se ligji i ri u miratua në fund të vitit 2024, dhe me këtë për herë të parë u rregullua vlefshmëria e arsimit joformal dhe të mësuarit me përvojë, avancohet procesi i verifikimit të programeve speciale të arsimit të të rriturve ndërsa akreditimi i institucioneve dhe drejtorive të arsimit të të rriturve po thjeshtëzohet dhe kalohet tërësisht në kompetencë të Qendrës”, shtoi” ministrja.
Duke shprehur mirënjohje për të gjithë ata që ndihmuan në zhvillimin e Strategjisë, Janevska theksoi se vijon hapi më i rëndësishëm – implementimi.
“Statistikat thonë se 25% e popullsisë në Maqedoni nga mosha 25 deri në 64 vjeç është e përfshirë në aktivitete arsimore dhe trajnuese. Le ta ndryshojmë këtë fakt dhe të arrijmë mesataren evropiane rreth 47%. Çdo qytetar i aftë për punë duhet të avancohet vazhdimisht me aftësi që shoqëria e sotme i njeh si të rëndësishme për sukses”, theksoi ministrja e Arsimit dhe Shkencës.
