Targa me ngjyrë të kuqe, me numra dhe shkronja të shkruara me të verdhë, të cilët janë tejet të dallueshme nga targat e zakonshme të automjeteve. Kështu duken automjetet e para zyrtare në pronësi të shtetit të cilave iu vendosën targat e reja.
Zëvendëskryeministri për Qeverisje të Mirë, Arben Fetai, përshëndet këtë veprim, duke thënë se i njëjti njëherë e përgjithmonë do t’i japë fund keqpërdorimit të automjeteve zyrtare.
“Unë mendoj se me identifikimin e veturave zyrtare përmes tabelave të veçanta merr fund një abuzim, i cili ishte karakterizuar me qeverisjen paraprake dhe nuk do të ketë më fenomene të tilla, pasi që qytetarët, mediat dhe kështu me radhë do të jenë në gjendje për të identifikuar veturat zyrtare në çdo moment.”, – u shpreh zëvendëskryeministri për Qeverisje të Mirë, Arben Fetai.
Për momentin në vend nuk ka regjistër përmes së cilës do të vërtetohet numri i saktë i automjeteve zyrtare në pronësi të shtetit. Sipas autoriteteve numri i automjeteve zyrtare lëviz prej 7 deri më 7.500 automjete zyrtare, por numri i saktë i tyre do të dihet deri në fund të këtij viti, ku MPB-ja do ta përpilojë regjistrin e parë të automjeteve zyrtarë.
