Pas vendosjes dje nga ana e Komisionit Antikorrupsion që të paraqesë iniciativë në Prokurorinë Themelore Publike, në lidhje me dyshimet për lëndën “Trust” për dëmtim të qëllimshëm të kreditorëve, mes të cilëve edhe shteti, sot Prokuroria Publike ka akuzuar Komisionin për Antikorrupsion se po sillet pa përgjegjësi dhe se e ngrin bashkëpunimin me ketë komisionin. Nga Prokuroria Publike thonë se kjo iniciativë e Antikorrupsionit është krejtësisht e panevojshme dhe jashtë ingerencave të saj, duke shtuar se nuk ka nevojë që ky komision paraqet iniciativa për rastet, për të cilat prokuroria veç më është duke vepruar.
“Siç është informuar tanimë tërë opinioni, Prokuroria Themelore Publike për Krim të Organizuar dhe Korrupsion ka formuar lëndë në të cilën janë përfshirë disa padi penale dhe në kuadër të të cilave shqyrtohet veprimi i të gjitha institucioneve gjatë konfiskimit të pronës së “Transmet”. Në kuadër të kësaj lënde është siguruar dokumentacioni i plotë, prova materiale dhe verbale dhe prokurori publik është para dorëzimit të akuzës. Prokurori publik në pajtueshmëri me të gjitha provat e siguruara dhe verifikimet e kryera, tanimë e ka kuptuar që në veprimin në lëndën “Trust” nuk është bërë asnjë lëshim. Me seancën publike të Antikorrupsionit, tanimë është shkaktuar dëm i panevojshëm edhe ndaj Prokurorisë si institucion, por edhe ndaj prokurorëve, të cilët kanë vepruar në lëndë.”, thuhet në kumtesë.
KShPK: Pa parë analizat nuk mund të jepet vlerësimi
Kanë reaguar nga Komisioni Antikorrupsion prej ku pyesin se si mund Prokuroria Publike pa i parë analizat të vlerësoj një iniciativë si të pabazë.
“Shtrohet pyetja se si Prokuroria Publike e ka vlerësuar iniciativën si të bazë dhe të pakuptimtë dhe se Komisioni gjatë analizës të rastit nuk ka pasur prova të shumta apo mbikëqyrje të gjendjes së plotë faktike, kur paraqitja ende nuk është dorëzuar, ndërsa Prokuroria ende nuk ka njohuri për materialet dëshmuese, që i kemi siguruar gjatë analizës së këtij rasti.”, thuhet në reagimin e Antikorrupsionit.
Nga ku shtojnë se edhe me tej do të vazhdojnë të veprojnë në përputhje me obligimet e tyre ligjore dhe të bashkëpunojnë me të gjitha institucionet kompetente për luftën kundër krimit të organizuar dhe korrupsionit në interes të sundimit të së drejtës.
