Kryetari i Komunës së Sarajit, Ilas Veseli, i shoqëruar nga deputeti i zonës, Blerim Bexheti, në mikpritje të banorëve të vendbanimit Semenishtë përuruan përfundimin e punimeve të bekatonizimit të një rruge alternative prej 1.400 metra katrorë, e cila, sipas autoriteteve të Komunës së Sarajit, do të lehtësojë qarkullimin e banorëve, e sidomos nxënësve të këtij vendbanimi.
Nga Komuna e Sarajit, janë zotuar se në periudhën që vjen, komuna do të vazhdoj punimet edhe në vendbanimet tjera me qëllim të përmirsimit të infrastrukturës rrugore në të gjithë komunën.
“Fjala e dhënë po mbahet gjithandej. Urime rrugën banorëve të vendbanimit Semenisht!” – ka qenë reagimi nëpër rrjetet sociale të deputetit të zonës, Blerim Bexhetit.
Ndryshe, nismat për bekatonizimin e rrugëve të vendbanimeve të Komunës së Sarajit, nisën më 29 dhjetor të vitit të kaluar, në Gllumovë, ku ishin bekatonizuar dy rrugë. Nga atje, autoritetet e Komunës së Sarajit, u zotuan se kjo nismë do të vazhdojë edhe në vendbanimet tjera të kësaj Komune.
Kur jemi te Seminishta, Komuna e Sarajit më 27 dhjetor I kishte bërë thirrje publike Ministrisë së Mjedisit që të zhbllokojë projektin për “Lumin e Thatë” në këtë fshat.
Nga Komuna e Sarajit thanë se kanë bërë përgatitjen e dokumentacionit të plotë dhe kanë përfunduar të gjitha procedurat e nevojshme përfshirë këtu përgatitjen e projektit bazë nga Nëntori i vitit 2022 dhe kanë dhënë leje ndërtimi me datë 15 Shkurt 2023 për projektin e lartpërmendur. Por, sipas tyre, Ministria e Mjedisit, me datë 18 Korrik 2024 ka sjellë vendim për anulimin e procedurës për prokurorim publik për projektin e lartpërmendur.
