Jetojmë në një kohë kur stresi është i pranishëm në jetën e pothuaj të gjithëve ne.
Profesionistët e shëndetit mendor thonë se njerëzit që punojnë me shifra, me ligje, me afate strikte kohore, me sigurinë dhe shëndetin publik janë më të stresuarit. Ashtu siç ka profesione që jo vetëm nuk të lodhin, por të gëzojnë.
“Në përvojë time kam të paktën dy ekonomistë në ditë. Ekonomisti punon me shifra dhe nuk del dot nga kornizat si në profesion edhe në jetën personale. Dhe sa më tepër të kemi korniza aq më tepër ndihemi ngushtë dhe shfaqim stres”, thotë Arjana Rreli, Mjeke Psikiatër.
Bashkëpunimi me kolegët apo eprorët është një tjetër faktor stresues, që për disa profesione është edhe determinues. “Në vend të dytë janë mësuesit, dhe mjekët veçanërisht ata të urgjencave, që përballen çdo ditë e më shumë me të papriturën. Vazhdojmë me inxhinierët e IT-së, arkitektët, sepse punojnë me afate kohore të mirëpërcaktuara”, shpjegon ajo më tej.
Nën stres janë edhe juristët, avokatët, punëtorët e fabrikave të këpucëve që janë të ekspozuara ndaj lëndëve kimikë, që ndikojnë në sistemin nervor, si dhe punonjësit e call center-ave.
“Personat që punojnë në media janë në raporte njerëzore, të cilat i kanë të paparashikuara. Gjatë një muaji tre punonjës mediash mund të paraqiten tek unë, gazetarë, drejtues emisionesh e koordinatorë programesh kryesisht”, shton Rreli.
Mjekja tregon mënyrat si mos të na mposhtë stresi dhe të mos shtresëzohet për të gjetur më pas një moment për t’u shfaqur si ankth apo sëmundje të rënda mendore.
“Të mësojmë të themi jo dhe të mësojmë t’i delegojmë disa detyra, të marrim sa me shume kohë për veten dhe jetë sociale duke folur me miqtë, por pa e ngarkuar njëri tjetrin. Sa më i përgjegjshëm për punën, aq më tepër je i stresuar për gjërat, që bën brenda profesionit”, thotë ajo.
Rreli tregon edhe për profesionet më pak stresuese. Nuk mbaj mend që tek unë të jetë paraqitur një fizkulturë apo kopshtar, pasi janë profesione që zhvillohen në natyrë apo që janë të lidhura me procesin e zhvillimit të një lule apo bime. Top Channel
