Një polic nga Çairi mblodhi 11 letërnjoftime të personave të tjerë dhe nuk ua dorëzoi ato qytetarëve që i zotëronin. Ai do të mbahet përgjegjës për veprën penale të punës së pakujdesshme në shërbim, dhe gjithashtu do të pezullohet nga puna derisa kundër tij po zhvillohen procedura disiplinore.
Sipas informacioneve nga Ministria e Punëve të Brendshme, kallëzim penal është paraqitur në Prokurorinë Themelore Publike për ndjekjen penale të krimit të organizuar dhe korrupsionit kundër D.S., i cili punon si polic në stacionin policor të Çairit në Shkup.
Si person zyrtar në ambientet e Departamentit për Çështje Administrative të Shkupit, ai nënshkroi dhe mblodhi 11 letërnjoftime dhe një listë-raport për letërnjoftime të skanuara për njerëzit që jetojnë në Komunën e Çuçer Sandevës, por nuk i dorëzoi ato në stacionin rajonal policor në Mirkovc në mënyrë që qytetarët të mund t’i merrnin, as nuk raportoi se mungonin. Duke vepruar kështu, ai u shkaktoi dëme materiale qytetarëve dhe kufizoi të drejtën e tyre për t’i përdorur dhe për t’i përgatitur dhe mbledhur letërnjoftimet në kohë.
“Departamenti për kontroll të brendshëm, hetime penale dhe standarde profesionale do të paraqesë propozim për të filluar procedurë kundër policit për shkelje të rendit të punës dhe disiplinës dhe do të shqiptojë masa të detyrueshme – konfiskim të armës zyrtare dhe municionit dhe largim nga vendi i punës – pezullim deri në përfundimin e procedurës disiplinore”, njofton Ministria e Brendshme.
