Dibra sot shënoi një moment të rëndësishëm në sektorin e shëndetësisë, me shpërndarjen e 19 vendimeve të përhershme pune për personelin e Spitalit të Përgjithshëm të qytetit. Drejtori i këtij institucioni, Mersim Koleci, njoftoi se për herë të parë, në një ditë të vetme, janë zgjidhur statuset e 15 punonjësve mjekësorë dhe 4 punonjësve teknikë.
“Që nga marrja e detyrës, prioriteti ynë ishte të zgjidhnim këtë padrejtësi shumëvjeçare. Sot, ky premtim u bë realitet. Me këtë hap, jo vetëm që i kthejmë dinjitetin punonjësve tanë, por edhe forcojmë dukshëm kapacitetet e spitalit”, u shpreh drejtori Koleci.
Ky vendim vjen si pjesë e angazhimit të qeverisë dhe Ministrisë së Shëndetësisë për stabilizimin e vendeve të punës në sektorin publik shëndetësor dhe përmirësimin e kushteve për stafin që për vite të tëra ka punuar në pasiguri kontraktuale.
“Ndryshimi po ndodh dhe po ndodh në mënyrë konkrete. Jo më vetëm me fjalë, por me vendime që prekin jetën e njerëzve”, theksoi drejtori, duke e mbyllur mesazhin me moton: “Ndryshimi ja VLEN!”
