Forcat e Policisë së Shtetit kanë zbarkuar në orët e para të mëngjesit pranë godinës së medias News24, duke kërkuar lirimin e ambienteve ku ndodhen redaksitë e News24, BalkanWeb, Panorama dhe Gazeta Shqiptare. Sipas mediave, ndërhyrja është bërë pa paralajmërim dhe pa vendim gjykate, ndërsa policia po pengon hyrjen e gazetarëve në ambientet e redaksive.
Në krye të uniformave blu raportohet se ndodhet Ardi Veliu, i cili si drejtues i shoqërisë “KAYO” pretendon se godina i përket kompanisë së prodhimit të armëve.
Asociacioni i Gazetarëve të Shqipërisë ka reaguar duke cilësuar këtë veprim si shkelje flagrante të parimeve themelore të demokracisë dhe lirisë së shprehjes, të garantuara nga Kushtetuta dhe aktet ndërkombëtare për të drejtat e njeriut. Organizata kërkon ndërprerjen e menjëhershme të aksionit, garantimin e aksesit të gazetarëve në ambientet e punës dhe respektimin e standardeve demokratike për lirinë e medias.
Në deklaratë, Asociacioni bën thirrje që çdo konflikt me televizionet private të zgjidhet me mirëkuptim dhe jo me përdorim force, dhe kërkon nga organizatat vendore dhe ndërkombëtare për lirinë e shprehjes të monitorojnë dhe reagojnë ndaj situatës.
Ende nuk ka pasur një përgjigje zyrtare nga autoritetet mbi arsyet e këtij veprimi.
