Me lëshimin e rrugës ekspre nga Stracini deri në Kriva Pallankë, udhëtimi nga 30 minuta do të shkurtohet në 10 minuta, ndërsa nga Kriva Pallanka deri në Kumanovë në vend që një orë do të udhëtohet 40 minuta.
Rruga, e cila zyrtarisht u lëshua sot, është në një gjatësi prej 25.5 kilometra dhe është pjesë e Korridorit 8. Investimi i përgjithshëm është 93.7 milionë euro, nga të cilat 80.20 milionë euro janë fonde nga Banka Botërore, ndërsa pjesa tjetër janë fonde granti në një vlerë prej 13.50 milionë euro.
Në rrugën ekspres janë ndërtuar tre kryqëzime, tre ura, 13 viadukte dhe 44 shpate. Ndërtimi ka filluar në maj të vitit 2018, intesivisht është punuar gjatë gjashtë muajve të fundit.
Drejtori i Ndërmarrjes Publike për rrugë shtetërore, Koce Trajanovski në lëshimin zyrtar, tha se realizimi i këtij projekti është rezultat i punës ekipore dhe të koordinuar, e jo rezultat i vetëm një subjekti.
“Në korrik të vitit 2024 kur u zgjodha drejtor i NPRRSH-së në seksionin e parë nuk ishte vendosur asnjë centimetër asfalt, ndërsa sot mburren se kanë mbetur vetëm punimet e përfundimit. Gjërat ishin jashtëzakonisht të ngadalta. Kur u bëra drejtor i NPRRSH-së për mua ishte sfidë dhe për këtë vendosa t’i përkushtohem plotësisht këtij projekti dhe vendosa që ta përfundoj deri në fund të vitit 2024, u vonuam vetëm tre ditë”, tha Trajanovski.
Theksoi se është planifikuar edhe projektimi i një rruge të re ekspres nga Kumanova deri në Stracin dhe ndërtimi i një kryqëzimi afër Ginovcit.
Kryeministri Hristijan Mickoski, i cili edhe mori pjesë në lëshimin nëpërdorim të këtij aksi rrugor, tha se kjo rrugë nuk është as e OBRM-PDUKM-së e as e LSDM-së, por e qytetarëve.
“Ka pasur të tillë që sot kanë bërë promovim politik dhe në vend që t’u kërkojnë falje qytetarëve që nuk kanë bërë diçka në gjashtë vitet e kaluara, sot vrapojnë të mbledhin pikë politike. Dua të them se kjo është rruga e qytetarëve, kjo nuk është rruga as e LSDM-së e as e OBRM-PDUKM-së. Kredia do të shlyhet nga paratë e qytetarëve, prandaj askush nuk mund ta përvetësojë atë”, tha Mickoski.
Ministri i Transportit dhe Lidhjeve dhe zëvendëskryeministër Aleksandar Nikolloski vlerësoi se kjo rrugë është arterie jetike për lidhjen me Bullgarinë dhe dëshiroi që të zhvillohen objekte të reja industriale dhe të ringjallet pjesa lindore e vendit.
