Reshjet e dendura të shiut të ditës së djeshme kanë shkaktuar përmbytje në Durrës.
Problematika më të theksuara paraqiten në rrugët dytësore në zonën e Durrësit të Ri, Shkozetit, Gjykatës së Apelit dhe pjesërisht në Zonën e Plazhit.
Ministria e Mbrojtjes bën të ditur se ka prani të ujit në një numër të konsiderueshëm banesash dhe ambientesh publike.
Sipas burimeve zyrtare, deri tani janë identifikuar 300 banesa të përmbytura, nga të cilat 200 në Durrës, 60 në Shkozet dhe të tjerat në njësi të ndryshme administrative.
Zona e ish-Kënetës ka problemet më të shumta, pasi janë shkaktuar dëme të mëdha tek orenditë shtëpiake. Probleme janë shënuar edhe në kodrën e Currilave, ku ka pasur rrëshqitje të dherave duke bllokuar rrugën që kalon në këtë zonë.
Autoritetet kanë bërë evakuimin e disa familjeve, të cilat janë akomoduar te Kavalishenca. Krahas ndërtesave, nën pushtetin e ujit janë edhe rreth 40 hektarë tokë bujqësore.
Në mbështetje të forcave në terren janë angazhuar 2 pompa thithëse me kapacitet të lartë dhe 3 kamionë të kalueshmërisë së lartë nga Forcat e Armatosura.
Tv Klan
