Sekretari i Komunës së Çairit, Faruk Nevzati, ka denoncuar publikisht mospërputhjet e mëdha mes Planit Operativ për mbledhjen dhe transportin e mbeturinave komunale dhe gjendjes reale në terren. Sipas tij, ndërmarrja publike “Higjiena Komunale” mashtron qytetarët duke paraqitur shifra të rreme për kontenjerët e vendosur në Çair dhe frekuencën e mbledhjes së mbeturinave.
“Plani operativ për vitin 2025 parashikon 585 kontenjerë në territorin e Çairit, por sot kemi vetëm 307. Kjo është gati 50% më pak dhe pasqyron një dështim të madh menaxherial,” thekson Nevzati. Ai shton se edhe pse është paraparë që mbeturinat nga koshet plastike të mblidhen dy herë në javë, në realitet kjo ndodh vetëm një herë – pa orar të rregullt dhe pa transparencë.
Nevzati kërkon që dikush të japë llogari për këtë gjendje, duke e cilësuar si të papranueshme që qytetarët të vuajnë pasojat e vendimeve politike. Ai njëkohësisht vlerësoi përkushtimin e punëtorëve të ndërmarrjes, por nënvizoi se fajin e ka menaxhmenti dhe kryetarja aktuale e Komunës së Shkupit.
“Nuk guxon politika të përdoret për nevojat emergjente të qytetarëve, të cilat ndikojnë drejtpërdrejt në shëndetin e tyre,” përfundoi ai.
