Pas zgjedhjeve shumica parlamentare mund të veprojë drejt rikonstruimit të Qeverisë. Jo zyrtarisht mësohet se partnerët e koalicionit mbrojnë idenë që disa figura nga ekzekutivi do të kalojnë në pushtet lokal, gjë që obligon kryeministrin ta freskojë kabinetin.
I pari që mund të lë Qeverinë është Zllatko Perinski si emri më i lakuar për kandidat në Qytetin e Shkupit. Ministria e Pushtetit Lokal do të mbetet në zarin që njëri nga partnerët e koalicionit do ta hedhë për të hequr dorë nga një dikaster tjetër. Emri i dytë që mund të ikë nga pushteti qendror është zëvendësministri i Energjetikës, Mirosllav LLabudoviq. Ai, jozyrtarisht, synon Komunën Qendër, si kuadër i partisë ZNAM të Maksim Dimitrievskit. Ky i fundit ka kërkuar nga VMRO-DPMNE-ja bashkëpunimin për zgjedhjet lokale në Kumanovë, por partia e Hristijan Mickoskit duket se po shqyrton mundësinë për të garuar e vetme në Kumanovë duke besuar në zgjerimin e strukturës, mbështetjes dhe përfaqësuesve që nga ky qytet ka në legjislativ dhe ekzekutiv. Nuk përjashtohet mundësia që Pushteti Lokal të jetë në Pazar shkëmbimi me Drejtësinë për shkak të performancës së dobët, ashtu siç i cilëson VMRO-DPMNE-ja, atë të ministrit Igor Fillkov të cilit në rrethana jo zyrtare mësohet se i është potencuar edhe në mbledhje të Qeverisë se duhet të zgjidhë çështjen e Këshillit Gjyqësor dhe të mos e mbajë reformën në gjendjen “tërhiqe mos e këput”.
Plani për rikonstruim të Qeverisë mund të zgjerohet edhe më shumë madje edhe në eshalonë më të ulëta. VMRO-DPMNE-ja planifikon të freskojë përfaqësimin edhe në radhët e zëvendësministrave dhe drejtorëve, ndërsa VLEN për momentin nuk mbështet një ide të tillë. Mozaiku i ekzekutivit mund të ndryshojë edhe me zgjerimin e mundshëm të shumicës parlamentare pas zgjedhjeve lokale. /Alsat.mk
