Pasi që presidentja Gordana Siljanovska-Davkova nuk e nënshkroi Dekretin e Ligjit për mbrojtjen e fëmijëve, pasi sipas saj, amendamentet e votuara përmbajnë disa dispozita kontroverse. Qeveria fillimisht do ta përpunojë atë, e më pas do t’ia dorëzojë Kuvendit brenda afateve ligjore. Por, kanë pësuar reagimet e subjekteve politike. BDI-ja mosnënshkrimin e dekretit nga presidentja e kanë konsideruar si sulm i hapur ndaj gjuhës shqipe dhe një përpjekje për të minuar të drejtat e shqiptarëve në Maqedoninë e Veriut.
“Jemi thellësisht të shqetësuar dhe të zhgënjyer nga urrejtja e vazhdueshme, nga mungesa e vullnetit për bashkëjetesë, nga përpjekjet e pandalshme për të shtypur gjuhën shqipe dhe për të zhvlerësuar shqiptarët në këtë shtëpi të përbashkët. Jemi të zhgënjyer edhe nga heshtja e atyre bashkëqytetarëve që shohin, por nuk reagojnë. Kjo nuk është vetëm një çështje e shqiptarëve, kjo është një çështje e vlerave të këtij shteti. Vlerat e vërteta nuk maten me atë se sa ulet tjetri, por me atë se sa mund të rritemi së bashku, me respekt dhe mirëkuptim. Bashkëjetesa nuk është dobësi, por forcë. Ndryshimet nuk janë pengesë, por pasuri.”, – thuhet në komunikatën e BDI-së.
LSDM-ja ka kërkuar nga Qeveria që të heqë dorë tërësisht nga ndryshimet në Ligjin kontrovers për mbrojtjen e fëmijëve.
“E mirëpresim mosnënshkrimin e dekretit nga presidentja e vendit, Gordana Siljanovska Davkova, me të cilin u hap kjo mundësi, dhe kërkojmë që Qeveria të tërhiqet nga synimet e saj për shkak të dispozitave kontradiktore që përmban. Neni 9 dhe neni 10 i Projektligjit për ndryshime të propozuara nga Qeveria nënkuptojnë futjen e licencave dygjuhëshe në fushën e mbrojtjes së fëmijëve. Është e diskutueshme që ky segment rregullohet me një ligj tjetër që rregullon përdorimin e gjuhëve, si dhe me Kushtetutën e vendit.”, thanë nga LSDM.
Sipas Ligjit për Kuvendin, nëse presidentja vendos mos të nënshkruajë dekretin për shpalljen e ligjit, Kuvendi e rishqyrton ligjin në përputhje me Rregulloren e Punës, brenda 30 ditëve nga data e miratimit të tij. Gjatë rishqyrtimit të ligjit, amendamentet mund të sillen vetëm në lidhje me nënshkrimin e presidentit të shtetit. Nëse gjatë rishqyrtimit Kuvendi e miraton ligjin me së paku 61 vota, kryetarja Siljanovska-Davkova është e obliguar ta nënshkruajë dekretin për shpalljen e tij. Kujtojmë se ndryshimet në Ligjin për Mbrojtjen e Fëmijëve u miratuan më 24 dhjetor ku për këtë ligj votuan 63 deputetë.
