Pas një aksidenti me motoçikletë, ka ndërruar jetë biznesmeni nga Maqedonia e Veriut, Dushko Çifliganec, përcjell TV21. Aksidenti ndodhi sot në pistën e njohur të garave me motoçikleta në Brno. Sipas informatave të para, Çifliganec humbi kontrollin mbi motoçikletën në një kthesë me shpejtësi të madhe, doli jashtë piste dhe pësoi lëndime të rënda, veçanërisht në zonën e kokës.
Dushko Çifliganec ishte zv/president i “Adora Business Group” dhe drejtor i Adora Living Solutions. Ai ishte djali i sipërmarrës të njohur dhe profesorit universitar Vanço Çifliganec, themelues i kompanisë ndërtimore “Adora Engineering”. Familja Çifliganec biznesin familjar, të themeluar në vitin 1992, arriti ta shndërrojë në një grup me aktivitete në ndërtimtari, banka dhe energjetikë në Maqedoni, Serbi dhe Greqi.
Çifliganec ishte i njohur si entuziast dhe dashamirës i garave me motoçikleta dhe makina për shumë vite. Në dy vitet e fundit, ai mori pjesë aktivisht në gara ndërkombëtare, ku fitoi edhe çmime prestigjioze.
Ai shpesh herë ishte edhe mysafir në TV21, ku gjithmonë u jepte të rinjve kuraje për punë dhe sukses.
