Presidenti i Serbisë, Aleksandar Vuçiq, në intervistën e djeshme për “RTS” ka komentuar iniciativën e fundit nga kryediplomati shqiptar i Maqedonisë së Veriut, Bujar Osmani të quajtur “QUAD”, ku përveç Maqedonisë së Veriut është përfshirë dhe Kosova, Shqipëria dhe Mali i Zi.
“Është për të treguar mbështetje 100 për qind për vendimet e BE-së. Ata mund të kishin vënë një slogan “100 për qind nuk jemi ne, të tjerët vendosin në emrin tonë”. Nuk e di pse ju duhen ministritë për Punë të Jashtme, mund të gjejnë dikë për ta pranuar e-mailin kur në Bruksel do të sillet ndonjë vendim dhe do të thonë ja ky është vendimi ynë, sepse asnjë vendim se marrin vet”, ka deklaruar presidenti serb, Vuçiq.
Kujtojmë se, ditë më parë Nisma e ministrit Bujar Osmani, QUAD i Ballkanit Perëndimor- Maqedonia e Veriut, Shqipëria, Kosova dhe Mali i Zi, nga mediat e regjimit të Putinit në Rusi u vlerësua si “anti-serbe” dhe si “presion ndaj Serbisë”.
