Kandidati për kryetar të Komunës së Çairit, z. Izet Mexhiti, në bashkëpunim me arkitektin me renome botërore z. Bajram Vardar, do të
prezantojë nesër Master Planin për Çairin, rezultat i dy muajve punë intensive të një ekipi ekspertësh në fushën e planifikimit urban dhe arkitekturës.
Ky Master Plan është përgatitur me synimin për ta shndërruar Çairin në një model të zhvillimit të qëndrueshëm dhe urbanizmit modern në Shkup,
duke reflektuar nevojat bashkëkohore të qytetarëve dhe potencialin historik, kulturor e ekonomik të komunës.
Z. Bajram Vardar, urbanist me prejardhje nga Shkupi, i cili jeton dhe punon në Turqi, ka drejtuar ekipin e ekspertëve në hartimin e këtij plani strategjik. Vardar ka një karrierë të spikatur në zhvillimin urban të disa prej qyteteve më të mëdha në Turqi, si Stambolli dhe Bursa, dhe ka qenë pjesë e ekipit të ngushtë të z. Rexhep Taip Erdogan gjatë kohës kur ai ishte kryetar i Bashkisë së Stambollit.
Në grupin e ekspertëve mes të tjerëve bëjnë pjesë edhe Nadir Dogan, planifikues urban i diplomuar në Universitetin ‘Gazi’, themelues i
kompanisë ND İMAR A.Ş. dhe ekspert në hartimin e planeve hapësinore në shkallë të gjerë për qytetet si Stambolli, Bursa, Koxhaeli e Trabzoni, si dhe projekte të shumta për transformim urban. Pastaj dr. Mustafa
Tutar, arkitekt i diplomuar në Universitetin teknik të Stambollit me master në Universitetin e Misurit në SHBA dhe doktoraturë në fushën e
urbanizmit. Ai është pedagog universitar dhe themelues i kompanisë ‘Saydam Tasarım’ me mbi 800 projekte ndërkombëtare në fushën e dizajnit
dhe vizualizimit arkitekturor Krahas tyre, në ekip janë përfshirë edhe ekspertë të tjerë nga Turqia dhe vendi, të cilët kanë punuar ngushtë me urbanistë dhe arkitektë lokalë për të garantuar një qasje gjithëpërfshirëse dhe të përshtatur për realitetin dhe nevojat e Çairit.
Prezantimi zyrtar i Master Planit do të mbahet nesër (5 tetor 2025) në një ngjarje publike ku do të marrin pjesë qytetarë, ekspertë të fushës, media dhe figura publike.
