Po copëzohet koalicioni i udhëhequr nga Ali Ahmeti para zgjedhjeve lokale.
Partia Demokratike Turke (TDP) ka vendosur të garojë e vetme në zgjedhjet lokale që pritet të shpallen së shpejti. Partia do të dalë me lista të veta për këshilltarë dhe me kandidatë për kryetarë komunash.
Lajmi vjen pasi kryetari i TDP-së, Zulfiqar Zejnulla, në një intervistë për kanal 5 të mëhershme bëri të ditur se bashkëpunimi me “Frontin Europian” të udhëhequr nga BDI ka përfunduar. Ai theksoi se TDP do të mbrojë me prioritet interesat e komunitetit turk, duke shprehur shqetësim për retorikën gjithnjë e më të ashpër që përdorin dy blloqet më të mëdha etnike në vend.
Për largimin e TDP-së e konfirmoi nënkryetari i BDI-së, Arber Ademi, i cili tha se nuk bëhet fjalë për ndonjë përplasje brenda koalicionit, por për një vendim të zakonshëm politik të TDP-së.
“Jemi njoftuar se dëshirojnë të vazhdojnë praktikën e tyre për të garuar të pavarur në zgjedhjet lokale, dhe ne e respektojmë këtë vendim. Edhe më parë kanë ndjekur këtë qasje, edhe pse kanë qenë pjesë e koalicionit. Kjo nënkupton që ata nuk do të jenë pjesë e Frontit Europian në këto zgjedhje. Megjithatë, komunikimi ynë me komunitetin turk dhe përfaqësuesit e tyre politik mbetet i hapur,” deklaroi Ademi.
Pas këtij zhvillimi mbetet të shihet si do të veprojë deputeti i TDP-së, Bejxhan Iljaz, i cili ende është pjesë e grupit parlamentar të Frontit Europian në Kuvend.
Kujtojmë se vitin e kaluar, Frontin Europian e kishte lënë edhe Partia Demokratike Shqiptare (PDSh) e Menduh Thaçit.
Në ndërkohë, kryetari i Kuvendit, Afrim Gashi, pritet t’i shpallë zgjedhjet lokale deri në fund të kësaj jave, më 8 ose 9 gusht, sipas burimeve nga Kuvendi.
