Gjiganti teknologjik Google është paditur nga kompania italiane Moltiply Group, e cila kërkon një dëmshpërblim prej 2.97 miliardë eurosh, nën akuzën se ka abuzuar me pozitën e saj dominuese në treg dhe ka shtypur konkurrencën në sektorin e shërbimeve online.
Moltiply Group, e cila operon faqen e njohur italiane për krahasimin e çmimeve Trovaprezzi.it, ka ngritur padinë në një gjykatë në Milano, duke pretenduar se Google ka dëmtuar qëllimisht filialin e saj 7Pixel gjatë viteve 2010 deri në 2017, për të favorizuar shërbimin e vet të krahasimit të çmimeve – Google Shopping.
Ky veprim, sipas padisë, ka ndikuar në mënyrë të drejtpërdrejtë në kufizimin e konkurrencës dhe ka forcuar pozitën e kompanisë amerikane në tregun evropian të shërbimeve digjitale.
Ky nuk është rasti i parë ku Google përballet me akuza të tilla. Në vitin 2017, Komisioni Evropian e gjobiti kompaninë me 2.4 miliardë euro, duke konstatuar se ka shkelur ligjin e konkurrencës përmes promovimit të padrejtë të Google Shopping, në dëm të platformave konkurrente.
Në shtator të vitit 2023, Gjykata e Bashkimit Evropian hodhi poshtë ankesën e Google dhe e la në fuqi gjobën e vendosur nga Komisioni Evropian.
