Kandidati për kryetar komune të Çairit nga Aleanca Kombëtare për Integrim, Bujar Osmani, sot e prezantoi listën e këshilltarëve me të cilën do të garojë në zgjedhjet lokale në komunë.
Osmani theksoi se bëhet fjalë për një ekip njerëzish të ndershëm, të përkushtuar dhe të respektuar, pa bagazh politik, që vijnë nga të gjitha pjesët e Çairit dhe që ndajnë të njëjtën vizion – ndryshim të vërtetë dhe rilidhje me qytetarët.
“Kjo është një ekip që nuk do të presë që qytetarët të vijnë tek ata – ata do të shkojnë çdo ditë tek qytetarët. Që nga nesër fillon një aksion i madh terreni për vizitë në çdo rrugë dhe çdo lagje, për të prezantuar programin, por edhe për të dëgjuar problemet dhe nevojat e banorëve”, tha Osmani.
Bartës i listës është z. Kemal Matoshi, zëvendësdrejtor i gjimnazit “Zef Lush Marku”, profesor dhe sipërmarrës i suksesshëm, i cili, sipas Osmanit, është një njeri me kredibilitet dhe integritet të jashtëzakonshëm.
“Çairi po ndryshon, dhe ndryshimi fillon nga dëgjimi, komunikimi dhe partneriteti i vërtetë me qytetarët. Kjo është një listë këshilltarësh që do ta shihni rregullisht edhe pas zgjedhjeve – jo si politikanë, por si fqinjët tuaj, aleatë dhe zëdhënës në Këshill”, theksoi Osmani.
Ai paralajmëroi se me këtë ekip fillon beteja për rikthimin e besimit në pushtetin lokal dhe krijimin e një politike të re që u shërben qytetarëve, jo partive.
