“Diplomacia nuk është vetëm punë, ajo është mënyrë jetese që kërkon empati, kreativitet dhe guxim”, theksoi kryesuesi i OSBE-së dhe Ministri i Punëve të Jashtme Bujar Osmani para studentëve që sot ishin mysafirë të Ministrisë së Punëve të Jashtme. Temë e vizitës ishin prioritetet e Maqedonisë së Veriut në kuadër të kryesimit me OSBE-në, agjenda diplomatike për vitin 2023, si dhe të rinjtë, kur bëhet fjalë për të ardhmen.
“Kjo është shtëpia ime e dytë, këtu zhvillohen të gjitha proceset e rëndësishme për shtetin dhe përfaqësimin e tij në nivel ndërkombëtar. Si liderë të ardhshëm, ju keni një rol kyç në formësimin e një të ardhmeje më të mirë për të gjithë dhe besoj se kjo përvojë do t’ju ndihmojë të bëheni qytetarë më të vetëdijshëm, më të informuar dhe më të përgjegjshëm”, tha Osmani.
Gjatë bisedës me studentët, ai theksoi se mendimet e të rinjve dhe sektorit civil janë vendimtare gjatë krijimit të politikave, në kontekst të motos së Maqedonisë së Veriut si kryesues i OSBE-së “Fjala është për njerëzit”.
“Vetëbesimi ynë si vend kryesues i OSBE-së është shumë domethënës, sepse nga një vend që kërkoi mbështetje dhe ndihmë, ne jemi bërë një vend që ofron zgjidhje dhe jep një kontribut të rëndësishëm në politikën ndërkombëtare”, tha Osmani para studentëve.
Gjatë bisedës së hapur me studentët, Ministri bëri një krahasim mes dy profesioneve të tij, kirurgut dhe diplomatit.
“Kur bëj një paralele me profesionet e mia, mund të them se në kirurgji bisturia është instrument dhe në diplomaci fjala është instrument. Prandaj është shumë e rëndësishme ta mbajmë fjalën, sepse është mjeti ynë”, tha Osmani.
Studentët u interesuan gjithashtu se si kryesimi i OSBE-së nga Maqedonia e Veriut do të kontribuojë në avancimin e të drejtave të njeriut, por edhe si do të ndikojë që vendi ynë të ketë një pozicion më të mirë në negociatat me Bashkimin Evropian. 
