Presidentja e Kosovës, Vjosa Osmani, ka pritur në takim Sekretarin e Përgjithshëm të NATO-s, Mark Rutte.
Osmani tha se Serbia vazhdon të minojë përpjekjet për paqe dhe stabilitet në rajon.
Presidentja nënvizoi se Kosova tashmë ka arritur objektivat e NATO-s, por theksoi se për të forcuar këtë, është i nevojshëm një bashkëpunim i vazhdueshëm me aleatët.
“Kosova tashmë e ka arritur objektivin e NATO-s… Për ta rritur këtë na duhet bashkëpunim më shumë me NATO-n. Në këtë rrugëtim jemi shumë të vetëdijshëm me sfidat që po ballafaqohemi si dhe kërcënimet që vazhdojnë të rëndojnë mbi sigurinë e Kosovës dhe gjithë rajonit. Serbia vazhdon të minojë përpjekjet për paqe dhe stabilitet. Beogradi po synon të destabilizojë jo vetëm Kosovën, por gjithë rajonin. Sulmet në veri të Kosovës dhe sulmet ndaj NATO-s në vitin 2023 të organizuara dhe të mbështetura ndaj strukturave të Serbisë, janë dëshmi e qartë e këtij rreziku. Prandaj, prania e NATOs në Kosovë nuk është vetëm garanci për ne, por është barrierë e çfarëdo përpjekje për cenimin e paqes dhe stabilitetit. I bashkohemi thirrjes të përsëritura të BE-së dhe NATO-s për përgjegjësi ndaj sulmeve të ushtarëve të NATO-s. Mungesa e përgjegjësisë të autorëve veçse e ka inkurajuar Serbinë për sulme të tjera”, ka thënë Osmani.
Rutte gjatë ditës do të takohet edhe me kryeministrin Albin Kurti.
