Nuredini: Për herë të parë pas vitesh, pushteti reagon kur fyhen shqiptarët!

Përfaqësuesja e VLEN-it, Yllka Nuredini, ka reaguar përmes një deklarate të fuqishme ndaj thirrjeve ksenofobike të dëgjuara gjatë ndeshjes së basketbollit Maqedoni – Rumani në Kumanovë, duke vënë theksin te ndryshimi rrënjësor në qëndrimin institucional ndaj gjuhës së urrejtjes, që po vjen me përfaqësuesit e rinj shqiptarë në pushtet.
“Kësaj radhe, nuk u hesht. Dhe kjo ka rëndësi,” shkroi ajo, duke theksuar se për herë të parë pas shumë vitesh, funksionarët aktualë shqiptarë kanë reaguar qartë dhe me dinjitet ndaj sulmeve verbale antishqiptare.
Ajo kujtoi me kriticizëm të fortë heshtjen e mëparshme të BDI-së në raste kur shqiptarët janë ofenduar, rrahur apo poshtëruar në ambientet publike, shkolla, stadiume dhe institucione, duke vënë theksin se atëherë mbi dinjitetin e popullit është vënë frika për humbjen e pushtetit. “Kur bëheshin thirrje ‘vdekje shqiptarëve’ BDI nuk u shqetësua. Kur fëmijët tanë në shkolla quheshin ‘pushtues’ në librat e historisë askush nga ta nuk kërkoi llogari. Sot, kemi njerëz që nuk ulin kokën kur fyhen shqiptarët. Dhe kjo është një kthesë që duhet mbrojtur”, theksoi Nuredini.
Deklarata e saj përfundon me një mesazh të fortë: “Gjuhës së urrejtjes i ka ardhur fundi. Shqiptarët nuk janë më pa zë. Dhe pushteti nuk është më pa ndërgjegje”.