Komisioni Qendror Zgjedhor i Bosnjës dhe Hercegovinës ka votuar unanimisht për t’i hequr mandatin Milorad Dodikut si president i entitetit të Republikës Srpska.
Ky vendim pason dënimin penal me një vit burg ndaj Dodikut, si dhe ndalimin që atij i është vendosur për të mos ushtruar funksione publike për një periudhë gjashtëvjeçare.
Sipas ligjeve në fuqi, vendimi nuk është ende i formës së prerë, pasi pala mbrojtëse ka të drejtë ankese në Divizionin e Apelit të Gjykatës së Bosnjës dhe Hercegovinës. Afati për të paraqitur ankesën është dy ditë nga dita e njoftimit zyrtar. Pas përfundimit të procesit të apelimit, Komisioni do të shpallë zgjedhje të parakohshme për presidentin e Republikës Srpska.
Avokati i Dodikut, Goran Bubiq, ka paralajmëruar kërkesë për pezullim të përkohshëm të vendimit dhe ankesë në Gjykatën Kushtetuese.
Megjithatë, opozita nuk është ende “në disponim t’i shtrijë dorën Dodikut” pas fyerjeve të shumta ku Dodiku i quan ata “mercenarë të huaj” dhe “shërbëtorë të Sarajevës”.
