Ende vazhdon kontrolli i jashtëzakonshëm në Klinikën për Sëmundje të Fëmijëve për vdekjen e fëmijës 9-vjeçar, i cili humbi jetën të martën. Të njëjtat inspektime vazhdojnë në spitalin e Shtipit dhe te mjeku amë i fëmijës në Shtip. Deri më tani nuk ka informacione zyrtare nëse është gjetur ndonjë parregullsi në lidhje me vdekjen e fëmijës 9-vjeçar. Nga Inspektorati Shëndetësor thonë se vetëm pas mbarimit të inspektimit opinion do të informohet.
Alsat tentoi të marrë informacione nga Klinika e Fëmijëve në Shkup, se si është zhvilluar e gjithë situata dhe kush e ka kontrolluar fëmijën, specialisti apo specializantët, por drejtori i klinikës na drejtoi tek udhëheqësja e repartit intensiv, por e njëjta kur kuptoi se jemi gazetarë nuk e hapi më telefonin.
Nga LSDM thonë se asnjë dënim me para nuk i kthen jetët e fëmijëve të humbura që kanë ndodhur kohëve të fundit, prandaj kërkuan dorëheqjen e Taravarit dhe drejtorit të Klinikës, Memedit.
“Ministri i Shëndetësisë, Arben Taravari, së bashku me drejtorin e Klinikës për Sëmundjet e Fëmijëve, Memedi, duhet të japin dorëheqje. LSDM kërkon dhe insiston në hetim të plotë, analiza të thella dhe masa parandaluese. Duhet parandaluar kjo situatë, duhet gjetur burimin e këtyre tragjedive, nuk mund të presim të vdesin fëmijët dhe pastaj të reagojmë”, deklaroi Belkisa Zeqiri, anëtare e Bordit Ekzekutvi të LSDM-së.
Nga Klinika e Shtipit një ditë më parë thanë se fëmija më 14 janar në orët e mbrëmjes ishte dërguar në Repartin për sëmundje të fëmijëve në gjendje të rëndë dhe më pas është transportuar në Klinikën e fëmijëve në Shkup, ku dhe ndërroi jetë. Sipas informacioneve fëmija është pranuar në Klinikë në gjendje jashtëzakonisht të rëndë.
Një muaj më parë ndërroi jetë edhe një foshnjë 7 muajsh për të cilën kishte reagime të shumta në opinion. Prindërit e foshnjës 7 muajsh nuk pajtoheshin me deklaratën e Ministrit Arben Taravari, i cili tha se për fat të mirë nuk ka gabim mjekësor. Prindërit patën deklaruar se deri në fund do të kërkojnë përgjegjësi, pasi kanë dyshime se fëmija i tyre nuk është hospitalizuar në kohë në spital. /Alsat.mk
