Laura Villars, një pilote zvicerane e lindur më 29 gusht 1997, shpalli zyrtarisht ditën e djeshme kandidaturën e saj për presidencën e Federatës Ndërkombëtare të Automobilizmit (FIA), duke sfiduar presidentin aktual, sauditin Mohammed Ben Sulayem, i cili mban këtë post që nga viti 2021, si dhe kandidatin tjetër, ish-komisionerin e FIA-s, Tim Mayer. Pavarësisht rezultatit të zgjedhjeve, Villars tashmë ka hyrë në historinë e automobilizmit si gruaja e parë që kandidon për postin më të lartë në organin rregullator të këtij sporti në nivel global.
Villars vjen me një platformë të qartë dhe ambicioze, duke adresuar drejtpërdrejt problemet që kanë karakterizuar mandatin e Ben Sulayem, i shoqëruar nga polemika dhe largime të shumta nga pozitat drejtuese në vitet e fundit.
Një nga rastet më të përfolura ishte dorëheqja e ish-nënkryetarit të FIA-s, Robert Reid, i cili deklaroi: “E mora këtë detyrë për të ndihmuar në ndërtimin e një transparence më të madhe, një qeverisje më të fortë dhe një lidership më bashkëpunues, por me kalimin e kohës, këto parime janë lënë pas dore dhe nuk mund të vazhdoj më, me ndërgjegje të pastër, të jem pjesë e një sistemi që nuk i përfaqëson më ato”.
Në këtë kontekst, Villars premton të rikthejë një “qeverisje më demokratike dhe transparente”, siç e thekson vetë ajo: “FIA duhet të rikthehet të jetë federata e klubeve dhe licencuesve. Ambicia ime është një qeverisje më demokratike, më transparente, më e përgjegjshme dhe më gjithëpërfshirëse për gratë dhe brezat e rinj. Besoj fort se automobilizmi ka nevojë për diversitet dhe inovacion për të vazhduar të frymëzojë brezat e rinj në të gjithë botën”, u shpreh Laura Villars.
Programi i Villars mbështetet në pesë pika kryesore: Fuqizimi i klubeve përmes konsultimeve të rregullta dhe një qeverisje pjesëmarrëse. Rritja e transparencës financiare dhe e proceseve vendimmarrëse. Krijimi i certifikatës “FIA Eco-Performance”, që do të njohë udhëheqjen në fushën e qëndrueshmërisë mjedisore. Zhvillimi i programit “Gratë në Automobilizëm” (Girls on Track) dhe përmirësimi i mundësive për pjesëmarrje femërore në këtë sport. Themeli i një Akademie për Liderë të Rinj të FIA-s, si dhe pozicionimi i FIA-s si një institucion global udhëheqës në qëndrueshmërinë dhe sigurinë rrugore.
Villars ka garuar vitet e fundit në kategori të ndryshme si: F4 e Emirateve të Bashkuara Arabe, Ferrari Challenge Europe dhe Ligier European Series. Aktualisht, ajo garon pikërisht në këtë të fundit me ekipin Team Virage. Zgjedhjet për presidencën e FIA-s do të zhvillohen më 12 dhjetor 2025, gjatë Asamblesë së Përgjithshme që do të mbahet në Tashkent, Uzbekistan. Për të pasur një shans real për të fituar, Laura Villars do të duhet të sigurojë mbështetje të gjerë nga federatat anëtare në mbarë botën.
