Një fluturim i kompanisë ajrore British Airways nga Uashingtoni në Londër të shtunën u devijua për në Boston pasi u raportua një goditje e mundshme e shpezëve dhe tym në kabinë, thanë autoritetet.
Aeroplani aterroi në Aeroportin Ndërkombëtar Logan të Bostonit rreth orës 19:30 me kohë lokale, pasi ekuipazhi raportoi “një goditje të mundshme zogu dhe tym në kabinë”, konfirmoi Administrata Federale e Aviacionit (FAA) për CBS News.
Boeing 777 u ngrit nga Aeroporti Ndërkombëtar Dulles dhe ishte rrugës drejt aeroportit Heathrow të Londrës, raporton KosovaPress.
Një zëdhënës i British Airways tha se fluturimi u devijua si masë paraprake për shkak të një goditjeje të dyshuar të shpezëve, raporton KosovaPress.
Një zëdhënës i Autoritetit Portual të Massachusetts konfirmoi për CBS News, se një shpezë goditi avionin dhe e tëra kaloi fatmirësisht pa incidente.
Nuk dihet se sa persona ishin në aeroplan. Sipas FlightAware.com, aeroplani u ngrit nga Dulles pak pas orës 17:30. FAA ka njoftuar një hetim për ngjarjen.
Sipas FAA, numri i goditjeve të raportuara të shpezëve në SHBA vazhdon të rritet si rezultat i rritjes së popullsisë së kafshëve të egra, numrit të fluturimeve dhe motorëve më të qetë të avionëve modernë. Gjatë vitit 2023, rreth 19.400 goditje shpezësh u regjistruan në 713 aeroporte amerikane.
