Aeroportet e Maqedonisë së Veriut kanë fituar 16 destinacione të reja gjatë vitit të kaluar, ndërsa që së shpejti pritet të shpallen edhe më shumë linja ajrore, paralajmëroi zëvendëskryetari i Qeverisë dhe ministër i Transportit, Aleksandar Nikolloski.
“Paralajmëroj se në periudhën e ardhshme do të shpallen destinacione të reja ajrore nga aeroportet e Maqedonisë. Ende jemi duke negociuar për to, por do t’i shpallim shumë shpejt”, tha Nikolloski në televizionin Kanal 5, duke shtuar se vetëm për një vit plotësist ka ndryshuar mënyra se si funksionojnë aeroportet.
Numri i pasagjerëve, siç informoi, shënon rritje – aeroporti i Shkupit u rrit me 5 për qind në gjashtë muajt e parë, ndërsa aeroporti i Ohrit u rrit për 13 për qind.
Ministri Nikolloski pret që deri në fund të vitit, rritja do të jetë dyshifrore në të dy aeroportet, që, siç tha, do të paraqiste një rekord absolut në rajon.
