Ministria e Arsimit dhe Shkencës njofton se nga nesër hapet afati për aplikim për përfitimin e të drejtës për shujtën e subvencionuar për studentët, e cila do të vlejë gjatë vitit akademik 2025/2026. Të gjithë të interesuarit mund të aplikojnë deri më 5 shtator 2025.
Shuma e subvencionit është 140 denarë në ditë, e destinuar për blerjen e ushqimit nga të hënën deri të shtunën tek subjektet që prodhojnë, përgatisin ose shesin ushqim. Pagesa nuk realizohet gjatë pushimit veror, nga 1 korriku deri më 1 tetor.
Aplikimi bëhet vetëm online përmes portalit e-uslugi.mon.gov.mk. Të drejtë aplikimi kanë studentët e rregullt të regjistruar në ciklin e parë ose të dytë të studimeve, si dhe në programet e integruara, në universitetet publike dhe private në vend. Kushti është që aplikuesi të jetë shtetas i Maqedonisë së Veriut dhe të mos ketë të ardhura më të larta se paga minimale neto.
Për aplikim nevojiten formulari i plotësuar për shujtën e subvencionuar dhe deklarata për vërtetësinë e të dhënave. Të gjitha dëshmitë e tjera, si ato nga MPB, DAP apo fakultetet, sigurohen në mënyrë zyrtare nga vetë MASH.
Për çdo paqartësi gjatë aplikimit, studentët mund të kontaktojnë Sektorin për Standard të Nxënësve dhe Studentëve në adresën: subvencioniran.obrok@mon.gov.mk.
Ministria ka lidhur marrëveshje me Shparkase Bank SHA Shkup për realizimin e pagesave. Studentët që do ta fitojnë këtë të drejtë do të duhet të hapin një llogari të posaçme në këtë bankë, përmes së cilës do të realizohet subvencioni.
Gjithashtu, MASH thekson se aplikimi do të jetë i hapur edhe nga data 1 deri më 5 të çdo muaji gjatë vitit akademik, për studentët që nuk kanë aplikuar në afatin e parë ose atyre që u është ndërprerë e drejta për shkak të mosplotësimit të kritereve, në momentin kur ato kritere do t’i përmbushin.
