Më shumë se 25 vjet pas shpalljes së luftës në Kosovë si krizë humanitare, një refugjate që gjeti strehim në Kentucky ka ndërtuar një histori frymëzuese suksesi, përcjell TV21. Zekije Hasani kujton udhëtimin e frikshëm që e solli familjen e saj në Amerikë në vitin 1999. Ajo dhe bashkëshorti u detyruan të linin shtëpinë e tyre dhe të niseshin drejt Maqedonisë, vendi më i afërt ku mund të gjenin strehim.
“Në maj të vitit 1999 u detyruam të largoheshim nga shtëpia,” tha Hasani për Lex18.
Gjatë arratisjes, u kapën nga forcat armike, por arritën të shpëtojnë. “Dy netë dhe dy ditë e kaluam duke ecur në male. Ishte tmerrësisht, pamë shumë shtëpi duke u djegur, dëgjonim krisma dhe pamë trupat e vdekur,” rrëfen ajo.
Pas tetë javësh në një kamp refugjatësh, familja arriti në Lexington, ku mikpritja e njerëzve e la Hasanin e habitur. “Pashë rreth 100 njerëz dhe tabela që na mirëpritnin. Ishte diçka e paharrueshme,” tha ajo.
Në vitin 2002, duke folur pak anglisht, Hasani filloi të punonte në departamentin e veshjeve të Walmart-it në Richmond. Sot, më shumë se dy dekada më vonë, ajo është drejtoreshë e dyqanit.
“Secili ka një zë, secili është i vlerësuar dhe ka mundësinë për të arritur sukses,” tha ajo. Kolegët e saj u bënë si familje, duke e mbështetur në momente gëzimi dhe dhimbjeje. Kur humbi bashkëshortin vitin e kaluar, kjo mbështetje mori një kuptim edhe më të madh.
Hasani i atribuon suksesin punonjësve, klientëve dhe udhëheqjes së Walmart-it, që besuan në potencialin e saj dhe e ndihmuan të arrijë këtë pozicion. “Faleminderit për atë që bëni çdo ditë. Nuk do të isha ku jam sot pa ju,” tha ajo.
Ajo gjen gjithashtu forcë në besimin e saj dhe mirënjohje për mundësitë që Amerika i ka ofruar. “Faleminderit Zotit çdo ditë që jemi këtu. Kjo është diçka për të cilën nuk mund t’i themi faleminderit mjaftueshëm,” përfundoi Hasani, që nuk ka plane të ndryshojë karrierën dhe vazhdon të gjejë kënaqësi dhe qëllim në rolin e saj udhëheqës në Richmond.
