Kanadaja do të reagojë me forcë dhe menjëherë nëse Donald Trump vendos tarifa, tha kryeministri kanadez, Justin Trudeau.
“Nuk është ajo që duam, por nëse ai do ta bëjë, ne gjithashtu do të përgjigjemi,” tha Trudeau.
Tarifat janë një pjesë qendrore e vizionit ekonomik të Trump. Ai i sheh ato si një mënyrë për të rritur ekonominë amerikane, për të mbrojtur vendet e punës dhe për të rritur të ardhurat nga taksat.
Ekonomistët sugjerojnë se një veprim i tillë mund të ketë ndikime shkatërruese të menjëhershme në ekonominë e Kanadasë, duke rritur gjithashtu çmimet për amerikanët.
Kanadaja po përpiqet të shmangë një luftë tregtare. Ajo ka vënë në dispozicion më shumë se 1 miliardë dollarë kanadezë (690 milion dollarë amerikan) për të rritur sigurinë në kufirin e saj të përbashkët me SHBA-në, një pikë kyçe e mosmarrëveshjes për Trump, i cili duket se po përdor tarifat si një taktikë negociuese.
Gjatë mandatit të tij të parë, presidenti amerikan vendosi tarifa 10% për produktet kanadeze të aluminit dhe tarifa 25% për çelikun kanadez, sërish për shkak të shqetësimeve të sigurisë kombëtare.
Otava u hakmor duke vendosur tarifa për disa mallra, të cilat u zgjodhën për t’i dërguar një mesazh politik Trumpit dhe aleatëve të tij.
Një nga lëvizjet që Kanadaja do mund të bëjë si kundërpërgjigje ndaj Trump është taksimi i energjisë që i shet SHBA-së. Shtetet veri-lindore amerikane si New-York, Vermont dhe Maine, mbështeten në energjinë që marrin nga Kanadaja. Ndërkohë sipas të dhënave të qeverisë kanadeze, të paktën 30 shtete të tjera amerikane marrin një pjesë të energjisë nga shteti kanadez.
Kanadaja është gjithashtu furnizuesi kryesor i SHBA-së për naftën e pa përpunuar. Importi kanadez përbën 60% të naftës së papërpunuar të SHBA-së. Kjo është një kartë tjetër që Kanadaja mund të luajë kundër Trump.
Një tjetër opsion është heqja e alkoolit të importuar nga Amerika çdo dyqan në Ontario, gjë që do i dëmtonte shumë të ardhurat e prodhuesve amerikanë.
Të mërkurën, ministrja e jashtme Melanie Joly u takua me Sekretarin e Shtetit Marco Rubio për të dhënë një mesazh se tarifat do të ishin të këqija për të dy vendet dhe se Otava po trajtonte shqetësimet e Trump për sigurinë kufitare.
